A explanada do paseo marítimo de Culleredo converterase un ano máis nun gran espazo de divulgación científica coa celebración dunha nova edición da Feira da Ciencia, organizada polo Club de Ciencia do colexio Ría do Burgo coa colaboración do Concello de Culleredo, o Centro de Formación e Recursos da Coruña, o CETIM e M.Distribuciones.

O evento celebrarase o sábado 6 de xuño, entre as 12:00 e as 20:00 horas, reunindo a colexios, institutos, universidades, asociacións, empresas e entidades vinculadas ao ámbito científico e tecnolóxico.

Ao longo da xornada, o público asistente poderá achegarse a numerosos postos nos que se realizarán experimentos, demostracións e actividades participativas pensadas para todos os públicos. A feira busca achegar a ciencia dun xeito práctico, próximo e divertido, permitindo que nenos, nenas e persoas adultas poidan experimentar e participar activamente.

Estudantes e investigadoras/es de diferentes idades presentarán proxectos relacionados coa tecnoloxía, a innovación e distintas ramas científicas, convertendo o paseo marítimo nun punto de encontro arredor do coñecemento e da curiosidade.

Desde a organización destacan a importancia deste tipo de iniciativas para fomentar o interese pola ciencia entre a mocidade e promover actividades educativas e familiares no municipio.

A entrada será libre durante toda a xornada.