A CORUÑA 28 DE FEBREIRO 2026
MANIFESTO EN DEFENSA DA ESCOLA PÚBLICA
Hoxe estamos aquí porque a educación pública non se defende soa.
Este manifesto nace do traballo voluntario, rigoroso e comprometido das ANPA e AFA dos centros públicos da provincia da Coruña.
Nace das familias organizadas, das comunidades educativas que viven día a día a realidade das escolas e institutos.
Nace da experiencia directa, da escoita activa e da responsabilidade colectiva.
Estamos unidas e unidos porque sabemos algo moi claro: cando as familias se organizan, a escola pública faise máis forte.
Defendemos unha educación pública:
- de calidade
- con infraestruturas dignas
- con profesorado suficiente
- para todas as nenas e nenos, vivan onde vivan
As ANPA e AFA asumimos unha carga organizativa enorme, moitas veces moi por riba das nosas obrigas formais.
Facémolo por compromiso coa educación pública, pero tamén porque as respostas estruturais non están chegando.
Porque as carencias existen.
Porque os problemas son reais.
E porque o benestar do alumnado está en xogo.
A defensa da escola pública é unha responsabilidade compartida. Require diálogo, planificación e, sobre todo, vontade política. Xusto o que non estamos a ver.
E o que estamos a dicir é claro.
Os centros públicos da nosa provincia —urbanos, periurbanos e rurais— comparten as mesmas necesidades urxentes:
- Falta de persoal docente e non docente
- Insuficiente atención ao alumnado con necesidades específicas de apoio educativo
- Deficiencias en mantemento, infraestruturas e accesibilidade
- Problemas de limpeza e seguridade
Non son casos illados.
Non son percepcións esaxeradas.
Son realidades repetidas, coincidentes e sostidas no tempo en centros moi diferentes entre si. Isto non vai de estatísticas frías.
Vai de nenas e nenos que precisan apoio e non o teñen.
Vai de profesionais desbordados.
Vai de familias que ven como se deterioran as condicións educativas mentres as solucións se aprazan.
E nós dicimos alto e claro:
- As crianzas non poden seguir esperando.
- Os centros non poden seguir sosténdose só ca vontade das familias.
- A educación pública precisa medidas reais, recursos suficientes e compromisos firmes.
Este manifesto non é un ataque.
É unha achega construtiva.
É unha chamada á responsabilidade.
É unha esixencia lexítima para garantir dereitos fundamentáis.
Porque defender a escola pública é defender a igualdade de oportunidades.
É defender o futuro.
É defender a xustiza social.
Hoxe mobilizámonos para dicir que a educación pública é unha prioridade, non un gasto.
Que investir en educación é investir en sociedade.
E que non imos calar mentres as necesidades sigan sen resposta.
- Pola escola pública
- Pola igualdade
- Polas nosas crianzas
Seguiremos organizadas. Seguiremos esixindo. Seguiremos defendendo o que é de todas e todos.